THURSDAY

18th Oct 2018

GET MY HOROSCOPE

app
Download
【連載:乃木坂46西野七瀨之nanase-self】-第一次
03.06.2018

59日發售 七瀨向你剖白傾注Photobook嘅心情,以及未載入1st Photobook容!


#「第一次」

一本令西野七瀨粉絲絕對想要且重要嘅 Photobook完成喇!

One piece (Right)/Chloé Customer Relations (SEE BY CHLOE) 


人生第一次去摩洛哥,受到動物嘅歡迎♡

我嘅第一本Photobook──Watashinokoto(わたしのこと)」終於發售。因為拍攝而到訪嘅摩洛哥,以前就覺得嗰度有好多好靚嘅景點,用嚟影相好靚,而對佢留有深刻嘅印象。實際去完,發現嗰度同時擁有被大自然包圍嘅休閒部份同大城市嘅部份,而且用塔吉鍋煮出嚟嘅食物又好好味,摩洛哥真係一個充滿魅力嘅地方!回國後,被團裡面唔少成員問過「摩洛哥好唔好玩?」,大家似乎都對摩洛哥好有興趣,我覺得摩洛哥係一個特別會令女生滿足嘅理想旅遊地點。

陪伴我度過飛去摩洛哥近20個鐘機程嘅,係林真理子所寫嘅小說「當你對著星星許願(星に願いを)」。喺摩洛哥其中一個回憶,就係搭一種叫「篤篤」嘅三輪的士,走過好似迷宮一樣嘅細長道路。感覺好似坐緊喺單車後座咁,搖得超勁,但又幾刺激同得意(笑)!馬拉喀什嘅街上有好多貓狗,可以接觸到我最鍾意嘅動物真係好開心。可能係附近嘅居民一直都好寵佢地,所以佢地都好親人,我一張開雙臂,佢地就會靠上嚟。拍攝個陣,一直圍住我隻腳唔肯走嘅貓仲同我一齊影咗張相,我特別鍾意個張相,到時大家記得留意

喺當地,我買咗一對叫「Babouche」嘅平底皮拖鞋送俾自己。最後揀咗一對有黑色簡約設計嘅。平時喺屋企,沖涼前後,我會分開著兩對唔同嘅拖鞋,我一直喺度等緊佢地其中一對變舊。當地用嚟綁窗簾嘅繩都好可愛,同造型師討論完選色之後,我決定買Grey beige嘅窗簾配松綠色同粉色嘅窗簾繩。返到屋企掛上去感覺超正,諗咗咁耐都係值嘅(笑)。


父女對談之後收到「冇事嘛?」嘅問候

因為要拍約會企劃,而去咗舊式嘅溫泉,同埋第一次同爸爸進行對談……喺Photobook裡面,我挑戰咗各式各樣嘅企劃!同爸爸對談完,收到媽媽擔心嘅問候:「冇事嘛?」(笑)。事實上,爸爸最近都有嚟東京玩,成日燒旗魚俾我食。火候啱啱好,飽滿嘅魚身超好味,不愧係爸爸嘅手藝(笑)。私服部份,我特別有注意唔會側重於同一個風格,然後嚴格挑選咗平時成日會著、好鍾意嘅單品出嚟。一次過展示咁多私服,可能今次係第一次。裡面必定有啲衫會令大家意外,希望大家到時可以睇得開心。

「Watashinokoto(わたしのこと)」裡面整合咗第一回到第三十回嘅「Nanase-self。」。由第一回開始睇返,以前同依家所諗嘅嘢可能都冇變過(笑)。但係,樣貌上就完全唔同咗!究竟邊度變咗,我都唔清楚……。大約三年前,頭髮長度去到胸口位。以前真係好俾心機去打理頭髮呢。依家剪Bob頭之後,變得超輕鬆,真係無法想像每日洗長髮然後要吹乾嘅生活係點(笑)。

今次決定要出Photobook嘅時候,曾經一瞬間有過不安:「究竟我最有價值嘅部份,可唔可以傳達到俾大家?」然而,依家完成之後,我可以自信咁講,如果係我嘅Fans嘅話,Photobook裡面嘅內容絕對係你哋想知嘅嘢!希望睇到我本Photobook嘅人,睇完之後,會比以前更了解我嘅內心世界。


為配合主題,「Doiya-san」識七十二變!

本月之nanase-sense

喺摩洛哥飲薄荷茶嘅時候,發現玻璃杯上嘅圖案好可愛。我將其中一部份畫咗喺Doiya-san身上!

★Doiya-san=Photobook裡面仲有齊哂喺以前嘅連載同附錄裡面畫嘅Doiya-san!


Model/西野七瀬 Photo/熊木優 (io) Hair & Make up/中山友恵 (Three PEACE) Stylist/笠原百合 Text/吉川由希子

Load more