SATURDAY

23rd Mar 2019

GET MY HOROSCOPE

app
Download
【連載:乃木坂46西野七瀨之nanase-self】-喜歡
24.02.2019

由冬天嘅必備元素,到可以俾到我哋活力嘅文化。

七瀨將會剖白佢鍾意嘅所有嘢

 

#「喜歡」

而家,我可以清楚分辨到咩嘢係必要嘅,

呢個亦都係我變得更成熟嘅證明。

BlouseSkirt/NON TOKYO

Earrings/ACCOMMODE LUMINE EST新宿店

西野七瀬1st Photobook『わたしのこと』好評發售中!

受到爺爺嘅影響,我開始愛上用有兔仔Logo嘅暖包

 

喺老家嘅時候,無論係聖誕樹嘅裝飾,定係換季,都係由媽媽全盤負責。但其實我一個人住嘅經驗越來越豐富,所以我都知道如果想喺唔同季節過得舒適嘅話需要啲咩……我一直都係憑住呢一點去決定屋企嘅風格。我好似變得更識得去分辨咩嘢係必要,咁即係代表我又成熟咗,對於呢一點我覺得好開心。譬如冬天嘅時候,我識得將加濕器拎去睡房度用、將睡衣由T-shirt換成鬆身嘅衛衣,再加埋將浴室嘅熱水器調高溫度就大功告成喇!而暖包都係冬天嘅必備品之一。睇住工作行程嘅時候,如果有預感「今日會長時間喺室外」嘅話,我就會帶埋暖包出去。雖然好多時喺拍攝現場嘅工作人員都有準備到暖包俾我哋,但我一般都會用自備而帶有兔仔Logo嘅暖包。因為由細到大都睇住爺爺用呢款暖包,所以喺我嘅認知裡面,暖包就等於呢款兔仔Logo嘅暖包(笑)。我平時好怕凍,所以就算買夠一箱,一個冬天就會用晒。

 

如果講到改變嘅話……我會諗起近年眼妝上嘅變化。由高中時代開始,我一直都習慣用眼線筆將眼尾延長,如果冇畫到嘅話我會覺得不安(笑)。但係,為non-no拍攝個陣,化妝師幫我畫嘅,一般都係只填滿睫毛根部嘅超自然眼線。最初我覺得咁樣真係OK?而有少少不安,但睇返影完嘅相,發現就算冇延長眼尾印象其實都冇咩改變。最近自己化妝嘅時候,亦都開始唔畫咁長嘅眼線。我終於喺24歲,告別全黑嘅眼尾(笑)。呢樣對我嚟講已經係好大嘅進步!

 

對於食物嘅偏好,亦都開始有所變化。因為電視節目而克服咗嘅茄子,而家反而變成我鍾意食嘅蔬菜之一。將佢拎去同豬肉一齊炒,再加入醬油同味淋調味,最後放喺白飯上面,我超鍾意嘅蓋飯咁就完成喇(笑)。最近,我亦都迷上咗小松菜。爽口嘅口感好正之餘,又可以同唔同嘅料理配搭,係一樣只要喺雪櫃有存貨就會令我安心嘅食材!


漫畫、電影、遊戲。呢幾樣嘢令我超忙碌!

 

前一段時間我開始迷上小品漫畫,特別係Mamekochimameko(まめきちまめこ)嘅作品真係超正!呢部每日都會更新嘅漫畫,成為我每一日嘅樂趣同期待(笑)。雖然內容只係一啲日常生活裡面嘅小事,但佢嘅描述角度同畫法真係好好。偶爾一啲關於貓狗嘅小故事,或者遊戲評價,都好有趣,令我成日睇睇下笑出聲嚟。

 

最近印象比較深刻嘅電影,係「人肉搜索(Searching)」。舊年冬天,喺搭飛機去上海開演唱會嘅途中,Iku(生田絵梨花)同我講一定要睇呢套戲,令我喺回程嘅飛機上揀咗呢套戲嚟睇。睇到中途嘅時候,我發現部戲淨係影住電腦上嘅畫面嚟推進故事,有別於一般通過演員表情去表達劇情嘅手法,呢部戲反而係通過鼠標嘅移動,同埋展現唔同嘅文章,去推進劇情和表達角色嘅心境變化。我津津有味咁睇完之後,仲同Iku討論觀後感添。

 

當然,我亦都好鍾意遊戲我同Karin(伊藤かりん)一齊開始玩嘅「Pokemon Star Let’s go」,令我哋沉迷到犧牲睡眠時間去玩添(笑)。下一個有興趣想玩嘅係「Fallout 76」。因為呢款遊戲係開放世界型嘅RPG遊戲,所以可以一路探索一路前進,拾取掉落嘅物品拎去賣又得。我好鍾意呢種自由度高嘅遊戲。如果開始玩嘅話,似乎又要變得忙碌喇(笑)。


 

為配合主題,「Doiya-san」識七十二變!

本月之nanase-sense


嘗試將Doiyan-san畫成佢鍾意睇嘅豆腐。佢嘅表情係表達緊「原來變成豆腐之後係咁嘅樣」。比起木綿豆腐,我更鍾意絹豆腐!

Doiyan-san=能夠令Doiyan-san專心到忘記時間嘅係肌肉訓練。最近熱衷於鍛練腳上嘅肌肉。


Model/西野七瀨 Photo/藤井由依 (Roaster) Hair & Make up/KITA (Nord) Stylist/前田涼子 Text/吉川由希子

Load more