WEDNESDAY

21st Nov 2018

GET MY HOROSCOPE

app
Download
【連載:乃木坂46西野七瀨之nanase-self】-打開
21.10.2018 / non-no MODEL

無論喺外在環境,定係七瀨嘅內心,

都有令佢可以打開心扉嘅地方。


#「打開」

譬如,打開遊戲包裝嘅瞬間。

由細個到而家,我得到期待好耐嘅嘢嘅時候都會緊張(笑)

BlouseSkirt/RENAI KEIKAKU LUMINE EST 新宿店

Earrings/Osewaya  (Osewaya)

Pumps/DIANA銀座總店 (DIANA)


比起柔軟嘅毛巾,我更喜歡硬身嘅毛巾

喺夏天全國巡迴演唱會嘅五個場之中,有三個係露天場地。戶外演唱會,唔單止感覺更開揚,而且隨住時間嘅變動,景色會改變呢一點都好正。特別係日落嘅時候,天空嘅顏色變得好靚,而且天氣更清涼,係我好鍾意嘅時刻。但係,綵排好多時都係喺艷陽高照嘅中午進行,所以需要做好萬全之策嚟應付高溫!大家一般都會用毛巾卷住少少冰,然後將毛巾放喺條頸上,然後再用另一條毛巾卷住個頭,去到淨係露出對眼嘅完全防備狀態。嗰時用嘅毛巾,往往都係由工作人員準備嘅。雖然只係非常普通嘅薄身白色毛巾,但因為比起柔軟嘅毛巾,我更喜歡硬身嘅毛巾(笑),對於重視吸水性多於觸感嘅我嚟講,嗰條毛巾真係簡單得嚟啱啱好。係鍾意到會令我覺得「好想喺屋企都用呢條毛巾」(笑)。

 

今次巡迴演唱會嘅歌單之中,有一個環節係由成員自己設計嘅。大阪演唱會之中,由我設計嘅企劃,就係集齊伊藤Karin(かりん)、伊藤純奈、川後陽菜、斉藤優里等一眾「西瓜組(スイカ)」成員,唱出「白米様」呢首歌!之所以會諗出呢個企劃,係因為同西瓜組成員一齊綵排嘅時候,大家都好興奮咁表示想唱呢首歌。雖然大家感情好到會私下一齊去旅行,但就未試過淨係我哋五個人一齊表演,機會難得,所以我哋諗到之後都即時向工作人員表達呢個意願。正式演出嘅時候真係好開心,甚至令我覺得「嘩大家都好情緒高漲」!帶有西瓜圖案嘅演出服超可愛,大家都係咁話好想要。但係,就算帶咗件衫返屋企,之後唔知幾時先可以再著到(笑)?

 

無論喺屋企定係遊戲嘅世界裡面,「準備」成為熱潮!?

喺私人時間,令我有解放嘅感覺嘅,就係返到屋企嘅瞬間。喺外面嘅時間越長,返到屋企嘅時候我就會越放鬆,覺得「終於都可以自己一個人獨處喇~!」(笑)。返到屋企後,我一般會換上家居服、洗手同漱口,然後喺客廳嘅梳化上休息一陣。如果仲有精力嘅話,我會睇下錄好嘅「ダーウィンが来た!生きもの新伝説」或者動畫版「貓貓日本史(ねこねこ日本史」,如果想早啲瞓嘅話,就會即刻熱定熱水沖涼。我會趁放緊熱水嘅時候,搽上睫毛膏卸除液,然後整理手袋。而且,我會喺熱水熱好嘅同時,打開睡房嘅冷氣,準備好一沖完涼即刻可以享受到。最近,我好鍾意好似咁樣編排自己嘅行動,去達到最高效率。喺腦裡面諗定「去睡房嘅時候順便拎埋○○過去」之類,按照計劃做嘢,有效率咁完成所有事,真係好有成就感好開心

講到「打開」,我細個嗰陣,我最鍾意嘅就係打開收到嘅遊戲嘅包裝嗰一刻。係會期待到會肚痛嘅程度(笑)。直到而家變咗大人,下載新遊戲嘅時候都依然會同時覺得期待同緊張。最近令我好沉迷嘅遊戲,係「Yonder 青與大地與雲之物語(Yonder 青と大地と雲の物語)」。雖然係冒險類遊戲,但就冇「敵人」嘅概念。基本上會聽取島民嘅訴求推進,係我鍾意嘅和平類遊戲(笑)。然而,玩呢個遊戲需要毅力,比如當出現「起橋」嘅要求,你就要收集大量石頭、粘土同埋草。但係,喺呢個情況下,我開始思考點先可以最有效率咁拎到所有嘢,譬如會諗「粘土喺河邊,去之前先將附近可以做嘅嘢清晒,再去河邊」之類,呢個思考嘅過程令我好開心。究竟行咩路線先可以有效率咁集齊晒所有需要嘅嘢……直到通關前嘅一個月,無論係遊戲世界定係屋企,我都係用緊同一個思維方式(笑)。


為配合主題,「Doiya-san」識七十二變!

本月之nanase-sense

Doiya-san打開眼睛嘅一瞬間。雖然平時隻眼係啞光質地,但今次嘗試咗加入引人注目嘅部份(笑)。

Doiya-san=雖然冇特別計劃冬眠,但已經開始儲定營養迎接冬天。

 

Model/西野七瀨 Photo/熊木優 (io) Hair & Make up/KITA (Nord) Stylist/松尾由美 Text/吉川由希子

Load more